Manchester United ka marrë fitoren e parë këtë sezon në Premier League dhe s’mund të vinte më e këndshme sesa me një fitore ndaj Liverpool.

Erik ten Hag ka fituar betejën e tij të parë të madhe në Premier League, ndaj Jurgen Klopp, me Man United që mposhtën Liverpool me rezultatin 2:1.

‘Djajtë e Kuq’ kaluan në epërsi qysh në minutën e 16’, me Jadon Sancho që dërgoi topin në rrjetë, pasi mashtroi tërë mbrojtjen e Liverpool.

Me golin e Sancho u mbyll pjesa e parë e këtij takimi, kurse United e nisi vrullshëm edhe pjesën e dytë.

Marcus Rashford shënoi në minutën e 53’ për të dyfishuar epërsinë, me një asistim të marrë nga Anthony Martial.

Liverpool synoi rikthimin në lojë me golin e Mohamed Salah në minutën e 81’, por kjo ishte krejt çfarë bënë ata deri në fund.

Manchester United merr kështu tri pikët e para këtë sezon dhe fitoren e parë nën drejtimin e Erik ten Hag në Premier League.

Ata numërojnë tri pikë. Liverpool mbetet në kuotën e dy pikëve me dy barazime dhe një humbje.